1. juuli 2023-mi atuisunut akit

2023-mi juulip aallaqqaataani atuisunut aki naleqqersuutaat tamakkiisoq, ukiup siuliani piffimmi pineqartumut sanilliullugu 2,5 pct.-imik qaffappoq. Nioqqutissaqarfiit immikkoortui tamangajammik qaffariaateqarput. Taamaattoq Ineqarnermut Inuussutissanullu nioqquteqarfiit naleqqersuummi qaffariaammut annertunerpaamik sunniuteqarput. Tassani inuussutissat 2,4 pct.-inik qaffariaateqartut Ineqarneq 5,3 pct.-inik qaffappoq.

 

Atuisunut akit naleqqersuutaat atuisut tamakkiisumik atuinerisa agguaqatigiissinnerannik uuttuuteqarnera eqqumaffigissallugu pingaartuuvoq. Tabel 1-imi uuttuutit takukkit. Nioqqutissaqarfinni ataasiakkaani akit tamakkerlutik allannguutaat akit naleqqersuutaannut tamakkiisumut annertunerusumik sunniuteqarsinnaanngillat, soorlu atuisut ataasiakkaat aamma akit allanngornerat allatut misigisinnaagaat, atuisut namminneq qanoq atuisarnerat apeqqutaalluni.

 

Taamatuttaaq eqqumaffigineqassaaq 1.januaarimiit 1.juulimut akit qanoq inissisimanerat naleqqersuummi takutinneqarmat, taamatullu piffissap pineqartup iluani akit qanoq allanngortigisimanerannut takussutissaammat. Saqqummersitamilu matumani 2023-mi juulip aallaqqaataani akit tunngavigineqarput, taamaasilluni juulip aallaqqaataannit ulloq saqqummersitsivissaq tikillugu akit allannguutaat ilaanngillat.

 

Qaammatit aqqaneq-marluk ingerlanerini qaffariaatit pct.-inngorneri titartakkami siullermi takutinneqarput.

 

Titartagaq 1. Atuisunut akit, qaammatit aqqaneq-marluk ingerlanerini qaffariaatit pct.-inngorlugit, 2019-imi juulimiit 2023-mi juulimut

Najoqqutaq: https://bank.stat.gl/PRNPRISV

 

Atuisunut akit ukiup affakkaarlugit ineriartornerat

Atuisunut akit ukiup affaani kingullermi, piffissami 2023-mi januaarimiit 2023-mi juulimut, 1,6 pct.-imik qaffassimapput. 2019-imi juulimiit 2023-mi juulimut atuisunut akini ukiup affakkaarlugit allannguutaat pct.-inngorlugit titartagaq 2-mi takutinneqarput.

 

Titartagaq 2. Atuisunut akit, ukiup affakkaarlugit allannguutaat pct.-inngorlugit, 2019-imi juulimiit 2023-mi juulimut

Najoqqutaq: https://bank.stat.gl/PRNPRISV

 

Nioqqutissaqarfiit ataasiakkaat sunniutaat

Nioqqutissanut kiffartuussinernullu atuisunut akit ineriartornerat nioqqutissaqarfiit taakku ataanniittuut ineriartuutaannit tunngaveqarpoq.

 

Atuisunullu aki naleqqersuutaanni qaffariaat annerpaaq Ineqarnermut nioqqutissaqarfimminngaanneerpoq.

 

Titartagaq 3. 2022-mi juulimiit 2023-mi juulimut nioqqutissaqarfiit akit naleqqersuutaannut sunniutaat, pct.-point.-inngorlugit

Najoqqutaq: https://bank.stat.gl/PRNPRISV

Malugiuk: Nioqqutissat assigiinngitsut atuisunut akinut naleqqersuummut sunniutaat takuneqarsinnaavoq. Akit nikissimanerat aamma qanoq oqimaalutarneqarsimanersut tassani apeqqutaapput.